Seeking Greener Pastures: First of all, Introduction

Seeking Greener Pastures: First of all, Introduction

Na so I enter Germo (Germany) on the 10^thof December, 2016 from Lagos, Nigeria. I sidon for waiting area for Munich Airport dey chill for Rahman. Rahman na d naija guy wen dem link me up with. Becos I no sabi anybody for Germo. Wetin I first observe na as everywhere just clean scatter, compared to Muritala Airport. Cold full ground, but my second hand yaba winter jacket hold side. Eveywhere just dark suddenly, I sharply check time and time na just 5:30 pm. I begin reason wetin dey happen, weda my time wrong or na different time zone. Only to find out say during winter, night dey come faster than normal. All this while Rahman never still show, I reload my mtn line with GTB online bank to use call am. Oboy, 1k credit finish after three minutes call. I respect myself, sidon wait jeje.

Las las, Rahman show, the guy sef just land Germo two months ago. Naija still dey smell for im body. Na so the two of us enter road dey go him place. As we enter bus, nobody dey ask for ticket, dem just expect say all man go do the right thing. Rahman don give me him spare ticket. Na so we rough am reach him bus stop (Freising). Piss don full my body, as we come down I sharply start to find where I go piss. But, as JJC, I dey fear to piss carelessly; make dem no go arrest black man. Rahman say make we leave load for bus stop enter corner piss. I ask Rahman, dem no thief our bag. The guy laugh, he say dem no dey thief for here, say if pesin carry our load, e go be our people (African) or foreigner. E say Germo pesin no go thief our load. Na so we leave load go piss come back and true true nobody carry the load. We enter bus wen carry us reach him hostel.

Oboy, I see hostel, I trip die. Hostel dey like Games village for Eric Moore for Surulere, Lagos. I enter im room, e first knack me wifi password. He nor even fear say I go finish him data, my guy laugh me scatter. E say my guy, use internet, nothing dey happen, na unlimited. Only first day for Germo, I don dey see as basic things when people dey take pose for naija, na normal thing for here. Dat one ginger me, I begin imagine how the rest of the country go be. I sleep with plenty expectation of a better tomorrow.  


Tags: Nigerian in Germany; pidgin; Naija living in Germany; pidgin blog; schooling in Germany; German waka